DOI: https://doi.org/10.36719/2663-4619/114/127-132
Mədinə Əliyeva
Odlar Yurdu Universiteti
magistrant
https://orcid.org/0009-0000-8563-1714
madina.aliyevaaa@gmail.com
Ənənəvi təhsil və texnologiyanın hibrid təhsil mühitindəki rolu
Xülasə
Məqalə ənənəvi təhsil və texnologiyanın qarşılıqlı əlaqəsini, onların üstünlüklərini və məhdudiyyətlərini araşdırır. XXI əsrdə süni intellekt, virtual reallıq və interaktiv platformalar təhsilin ayrılmaz hissəsinə çevrilməkdədir. Ənənəvi təhsil müəllim və tələbə arasında canlı ünsiyyət, akademik intizam və sosial bacarıqların inkişafı baxımından üstünlüklərə malik olsa da, fərdi öyrənməyə məhdud imkanlar və standartlaşdırılmış yanaşmalar kimi çatışmazlıqları mövcuddur.
Texnologiya isə təhsili daha çevik və əlçatan edir, adaptiv öyrənmə metodları və onlayn resurslar sayəsində fərdiləşdirilmiş tədris imkanı yaradır. Lakin tamamilə texnologiyaya əsaslanan təhsil sosial və emosional öyrənmə aspektlərini zəiflədə bilər. Buna görə də mütəxəssislər ənənəvi və texnoloji yanaşmaların balanslaşdırılmasının vacibliyini vurğulayırlar.
Hibrid təhsil modeli ənənəvi metodlarla texnologiyanı birləşdirərək daha effektiv və çevik öyrənmə mühiti yaratmağa imkan verir. Bu yanaşma həm müəllimlə birbaşa ünsiyyəti, həm də rəqəmsal platformaların interaktiv imkanlarını əhatə edir.
Fikrimcə, gələcəyin təhsili tamamilə texnologiyaya əsaslanmaqdan daha çox, ənənəvi və rəqəmsal metodların birləşdiyi hibrid modellərə yönələcək. Əsas məqsəd texnologiyanı təhsilə xidmət edən bir vasitəyə çevirmək və tələbələrin bilik və bacarıqlarını effektiv şəkildə inkişaf etdirməkdir.
Açar sözlər: təhsildə texnologiyalar, onlayn təhsil, hibrid təhsil, ənənəvi təhsil, rəqəmsallaşma, texnoloji inteqrasiya