DOI: https://doi.org/10.36719/2663-4619/118/14-23
Mehdi Qasımzadə
Azərbaycan Respublikası 132-134 saylı Təhsil kompleksi
https://orcid.org/0009-0000-3924-1352
mehdigasimzade09@gmail.com
Elmira Gocayeva
Azərbaycan Dövlət İqtisad Universiteti
iqtisad üzrə fəlsəfə doktoru
https://orcid.org/0000-0001-8413-4812
elmira_qocayeva@unec.edu.az
Şirkətlərdə innovasiyaların mövcud vəziyyətinin qiymətləndirilməsi:
Azərbaycan nümunəsi
Xülasə
Elmi-texniki tərəqqi prosesləri son illərdə sosial-iqtisadi inkişafın əsas hərəkətverici qüvvəsi kimi şərtlənir. Qeyd etmək lazımdır ki, sənaye inqilabları həmişə iqtisadiyyata həm mikro, həm də makro səviyyədə öz təsirlərini göstərmişdir. Xüsusilə, dördüncü sənaye inqilabı iqtisadi subyektlərin fəaliyyətində və sosial-iqtisadi amillərin gələcək trayektoriyasının formalaşmasında mühüm rol oynayan elmi-texniki tərəqqinin yüksək texnologiyalarını formalaşdırmışdır. Bu gün bir sıra elmi araşdırmalar göstərir ki, qabaqlayıcı strategiyalarla şirkətlərin rəqabət qabiliyyətini davamlı şəkildə artırmaq mümkündür. Bu strategiyaların əsasında innovasiyalar dayanır. İnnovasiya anlayışı geniş anlayış olmaqla bir sıra istiqamətləri səciyyələndirir. Bunlardan ən mühümü İnformasiya və Kommunikasiya Texnologiyalarıdır (İKT). Tədqiqatda Azərbaycan şirkətlərində İKT-dən istifadənin müasir vəziyyəti və onun istehsal həcminə müəyyən təsiri qiymətləndirilir. Bu işdə Azərbaycan şirkətlərində İKT-dən istifadə, şirkətlərin internetə çıxış imkanları, innovativ fəaliyyət üçün çəkilən xərclər kimi bir sıra göstəricilər statistik təhlil edilib. Eyni zamanda, Azərbaycanın yeni təsnif edilmiş iqtisadi rayonlarında, o cümlədən Qarabağ və Şərqi Zəngəzur iqtisadi rayonlarında fəaliyyət göstərən şirkətlərin göstəriciləri tədqiqata daxil edilib.
Açar sözlər: innovasiya, informasiya və kommunikasiya texnologiyaları, dördüncü sənaye inqilabı, internet, proqram təminatı