DOI: https://doi.org/10.36719/2663-4619/114/44-53
Xavər Ələkbərli
Milli Dövlət Xidməti Universiteti
doktorant
https://orcid.org/0000-0001-9988-3189
khavar.alakbarli@gmail.com
Milli brendinq və onun əsas komponentləri: Azərbaycan nümunəsi
Xülasə
Məqalədə milli brendinq anlayışları araşdırılmış və onun əsas komponentləri müəyyənləşdirilmişdir. Bu sahədə mövcud olan ədəbiyyat təhlil olunaraq, ölkə brendinqinə dair elmi yanaşmalar – o cümlədən brend identikliyi, brend imici və brend dəyəri kimi anlayışlar nəzərdən keçirilmişdir. Tədqiqat çərçivəsində Azərbaycan nümunəsi əsasında bir ölkənin brend imicinin formalaşmasında rol oynayan amillər – idarəetmə, mədəni irs, iqtisadi potensial, turizm, beynəlxalq münasibətlər və digər təsiredici faktorlar təhlil edilmişdir. Əksər elmi mənbələrdə vurğulandığı kimi, sistemli şəkildə qurulmuş və vahid strategiya ilə ifadə olunan ölkə brendi dövlətin beynəlxalq nüfuzunun gücləndirilməsində, xarici investisiyaların cəlb edilməsində və milli kimliyin möhkəmləndirilməsində mühüm rol oynayır. Məqalədə Azərbaycanın milli brend komponentləri və bu brendin formalaşmasında rol oynayan əsas cəhətlər elmi əsaslarla təqdim olunur və mövcud ədəbiyyata töhfə verilir.
Açar sözlər: milli brendinq, ölkə brendinqi, brend identikliyi, brend dəyəri, Azərbaycan