DOI: https://doi.org/10.36719/2789-6919/54/42-47
Elgün Cəlalzadə
NANO İKT
https://orcid.org/0000-0003-4391-3769
calalzadelgun00@gmail.com
Dövlət dəstəyi proqramlarının kiçik və orta
sahibkarlığın inkişafına təsiri
Xülasə
Kiçik və orta biznes (KOB) müasir iqtisadiyyatın əsas dayaqlarından biridir və iqtisadi inkişafın təmin edilməsində, məşğulluğun artırılmasında, innovativ fəaliyyətin təşviqində və bazar rəqabətinin gücləndirilməsində mühüm rol oynayır. İnkişaf etmiş ölkələrin təcrübəsi göstərir ki, dövlət tərəfindən düzgün qurulmuş tənzimləmə siyasəti və məqsədyönlü dəstək mexanizmləri KOB-ların sürətli inkişafı üçün əlverişli şərait yaradır. Bu mexanizmlərə vergi güzəştləri, subsidiyalar, kredit resurslarına çıxışın asanlaşdırılması, innovativ bizneslərin stimullaşdırılması və qanunvericilik bazasının optimallaşdırılması daxildir.
Azərbaycanda KOB-ların əsas dəstək mexanizmləri Kiçik və Orta Biznesin İnkişafı Agentliyi (KOBİA) vasitəsilə təmin olunur. Agentlik sahibkarlara təlim-tədris, hüquqi və məsləhət xidmətləri, innovasiya, marketinq və maliyyə sahələrində geniş imkanlar təqdim edir.
Son illərdə Azərbaycanda vergi dərəcələrinin proporsional sistemə keçirilməsi, ƏDV-nin azaldılması, sosial sığorta ayırmalarının endirilməsi və KOB-lar üçün sadələşdirilmiş vergi sisteminin tətbiqi kimi tədbirlər həyata keçirilmişdir. Vergi güzəştləri vergi ödəyicilərinin tam və ya qismən azad olunmasını, ödəniş müddətinin uzadılmasını və vergi bazasının optimallaşdırılmasını təmin edir. Gələcəkdə əsas prioritetlər rəqabətqabiliyyətli biznes mühitinin yaradılması, qanunun aliliyinin gücləndirilməsi və KOB-lar üçün bərabər rəqabət şəraitinin təmin edilməsidir. Maliyyəyə məhdud çıxış hələ də əsas maneə kimi qalır, buna görə də qəbul edilmiş islahatların tam və effektiv tətbiqi strateji əhəmiyyət daşıyır.
Açar sözlər: yerli, biznes, sahibkarlıq, subsidiya, istehsal