DOI: https://doi.org/10.36719/2663-4619/118/64-68
Asəf Hüseynov
Azərbaycan Respublikası DİN-in Polis Akademiyası
UOT KOD: 343.13
https://orcid.org/0009-0005-9525-1447
huseynovasef504@gmail.com
Cinayət-Prosessual Məcəllənin 28-ci maddəsinin
təkmilləşdirilməsinə dair
Xülasə
Bildiyimiz kimi, Azərbaycan Respublikası CPM-in 28-ci maddəsi “Cinayət mühakimə icraatının obyektivliyi, qərəzsizliyi və ədalətliliyi” adlanır. Sözügedən normativ-hüquqi aktın 7.0.8 -ci maddəsinə müvafiq olaraq cinayət mühakimə icraatı dedikdə, AR CPM ilə nəzərdə tutulmuş qaydada məhkəməyədək, habelə birinci, apellyasiya və kassasiya instansiyası məhkəmələrində aparılan icraat başa düşülür. Buna baxmayaraq 28-ci maddənin normaları yalnız hakim və məhkəmə anlayışlarından istifadə edərək cinayət mühakimə icraatının digər iştirakçılarının – prokuror, müstəntiq, təhqiqatçı və s. obyektiv, qərəzsiz və ədalətlilik prinsiplərini öz fəaliyyətlərinə tətbiq etməsinə ciddi normativ maneə törədir. Bu səbəbdən müvafiq maddədəki “məhkəmə” və “hakim” anlayışlarının cinayət mühakimə icraatının iştirakçıları ( prokuror, müstəntiq və hakim) anlayışı ilə əvəz olunmasını məqsədə müvafiq hesab edirəm.
Açar sözlər: obyektivlik, qərəzsizlik, ədalətlilik, ictimai iddia